Antroxu

Folixa y diversión ye lo propio d’esta fiesta.

L’Antroxu de Mieres foi ún de los primeros en recuperase n’Asturies depués del franquismu.

Hai desfiles-concursu con importantes premios y actividaes d’animación a cargu de grupos de teatru y charangues. El martes d’antroxu ye’l día dedicáu a nenos y nenes y el vienres depués celébrase’l “Gran antroxu” (anque yá se tea en Cuaresma). El cambéu de fecha débese a la coincidencia con otros sitios d’Asturies.

Símbolos d’esta folixa son “La Truchona del Caudal”, “que ye de ríu y non de mar”, reina del desfile, y la figura del “Antroxu”, elementu principal que ta inspiráu nun canecín románicu allugáu na ilesia de la Rebollá.
Esta ye una folixa popular de muncha importancia. Al desfile, contempláu por cantidá de xente , síguen-y otros actos del programa festivu como son les actuaciones de charangues participantes fuera de concursu, y la quema de la truchona.

Nestos díes too ye folixa y diversión. Les cais son asaltaes pola xente qu’ocupa chigres y pubs hasta que llega la mañana.

¿Préstate divertite?¡Has de venir!