“Autores nel camín”, presentación del llibru “Flashback”, de Dolfo Camilo Díaz

Lliteratura

Alcuentru lliterariu con Dolfo Camilo Díaz

Presentación del llibru
“Flashback. Yo fui ún de los nuestros (Un sicodrama con pingarates musicales)”

Martes, 12 d’avientu, 19:00h.

Sala Juvenil de la Biblioteca Pública de Mieres

CICLO AUTORES NEL CAMÍN

Un espaciu (la cuenca minera), un tiempu (el presente), y un sindicalista presuntamente corruptu (Don…) qu’un día espierta nel hospital y, al poco, ye’l protagonista d’un late show, Flashback, onde lu van entrevistar, son los elementos que formen la premisa d’esta obra. Don, confusu, yá nun sabe qué ye verdá o mentira, realidá o fantasía… ¿Qué ta pasando con él? ¿Por qué nun lu reconocen como prócer de la minería? ¿Por qué encoplen cantares italianos que darréu olviden? ¿Por qué nun entienden qu’él fizo evolucionar a la especie humana? ¿Por qué esa médica, o esa entrevistadora, lu tán torturando pa facelu confesar lo innecesario? ¿Quién son elles? ¿Quién ye Don? ¿Quién yes tu?

Flashback podía ser un llibru d’autoayuda, una novela romántica o, inclusive, una colección d’haikus… Pero nun lo ye. Flashback namás ye una comedia que fala d’una traxedia.

Dolfo Camilo Díaz (Ayer, 1963), historiador y xestor cultural, ye ún de los más renomaos escritores y dramaturgos asturianos. Cuatro veces Premiu Xosefa Xovellanos (Añada pa un güeyu muertu, Diariu de Viaxe, Imago y Advenimientu), dos veces Premiu «Montesín» de Lliteratura Xuvenil (Khaos y Memorial del monstruu), el Premiu María Josefa Canellada por La mar, amás del Premiu de Novela de l’Academia de la Llingua, Premiu de Narración «Fernández Lema», Premiu de Teatru «Alejandro Casona». Como dramaturgu estrenó pieces tan señalaes como País o Muyeres inesperaes. Tamién destaquen les sos facetes como músicu (Inaux, Patrimoniu) o ensayista (El cine fantaterrorífico español; El teatru popular asturianu). Dolfo Camilo Díaz ta traducíu al castellanu, francés, inglés y portugués.