Día Mundial de la Poesía 2022: Recital poetas galardonados con el Premio Teodoro Cuesta de Poesía

DÍA MUNDIAL DE LA POESÍA 2022

Recital:
Poetas galardonados con el Teodoro Cuesta de Poesía:
– Milio Ureta
– Pablo Antón Marín Estrada
– Marta Mori

Librería La locura
Viernes, 18 de marzo, 20:30 h.

Milio Ureta (Ribeseya,1970) Diplomáu n’Interpretación pel ITAE de Xixón y graduáu n’Humanidaes pola UOC, nel momentu presente esti escritor trabaya como Guía de Turismu ya Intérprete de Patrimoniu pal Ayuntamientu de Ribeseya.  Venceyáu profesionalmente al mundiu de la Escena y el Turismu Cultural, en 2019 asoleyaba con Saltadera el so primer poemariu, Poemes del amor simétricu. Nelli, Ureta daba voz a toa una serie d’alcuentros carnales y afectivos ente paisanos, que mos averaben a les nomaes afectividaes otres, y que teníen como voluntá principal la de vindicase, facese ver y ser dichos. Amás d’ello, namái va un añu, oferíamos de la mano de Delallama una cudiada y prestosísima traducción del Cantar de mi mesmu, del bardu americanu Walt Whitman. P’acabar, nel pasáu avientu l’autor yera lloreáu en Mieres col XXX Premiu Teodoro Cuesta de Poesía pola so obra Pexe les manes. Nesti testu (que ta por apurrimos ensin tardar muncho la editoral Trabe), el de Ribeseya nagua por amosa-y al lletor una rede de semeyes poétiques bien aborbotaes y necesariamente fresques, dende un compromisu marcadamente patrimonialista y de calter social, siempre col tresfondu sinificante y omnipresente del mediu marín.

Pablo Antón Marín Estrada (Sama, Llangréu, 1966), escritor y periodista. Ye autor de diversos volúmenes de poesía y narrativa. Ente los sos últimos títulos resalten: ‘Un palaciu enllenu d’ortigues’ (Suburbia, 2015), ‘La tierra y el cielu’ (Impronta, 2017), ‘Vides célebres y otros cuentos chinos’ (Impronta, 2020), ‘A pájaros. Crónicas dispersas’ (Impronta, 2020) y ‘Pozu sin fondu. Poesía 1989-2019 (Impronta, 2022).

Marta Mori d’Arriba (Xixón, 1965). Ye Doctora en Filoloxía Española. Trabaya como profesora d’Enseñanza Secundaria nel IES Xovellanos de Xixón y da tamién clase como profesora asociada na Universidá d’Uviéu. Ye autora d’artículos académicos de didáctica de la llingua y crítica y historia lliteraries, los más d’ellos rellacionaos cola lliteratura asturiana, de materiales didácticos, d’artículos de prensa y reseñes lliteraries. Collabora quincenalmente nel suplementu cultural de La Nueva España y dirixe la revista Lliteratura, que publica l’Academia de la Llingua Asturiana. Ye la vicepresidenta d’esta institución.

Como poeta, tien asoleyaos los poemarios Pórticu (Trabe, 2003), Premiu Teodoro Cuesta de Poesía nel añu 2002; El tiempu de la espera (Trabe, 2005), Premiu Teodoro Cuesta de Poesía ex aequo con Ánxelu Gutiérrez nel añu 2004; L’alcordanza (Academia de la Llingua Asturiana, 2010); La mio voz (Trabe, 2011), Premiu Xuan María Acebal de Poesía nel añu 2010 y Orfandá (Trabe, 2019). Publicó tamién el llibru de rellatos Histories familiares (Ámbitu, 2008) y una traducción d’El cementeriu marín de Paul Valéry (Saltadera, 2018).