Selmana de les Lletres Asturianes 2022. Tardes con Leo: ‘Prau’, de Daniel García y Esther Sánchez

Selmana de les Lletres Asturianes 2022

XUEVES, 5 DE MAYO
17:30h.

Cuentacuentos

Tardes con Leo ‘Prau’
de Daniel García y Esther Sánchez

Biblioteca Pública de Mieres

Inscripción previa na Biblioteca. Aforo llindáu.

L’álbum Prau, escritu por Daniel García Granda y ilustráu por Ester Sánchez, ye un llibru-homenaxe pa les neñes y los neños del rural asturianu, y tamién pa los mayores, que comparten cola reciella’l so llugar nel mundu. «Una historia», diz l’autor, «dende’l corazón mesmu de lo auténticamente asturiano».

Dende un prau marcha la borrina, la ciudá nun se ve apenes, queda tapecida, y los tréboles soplen si fai calorón. Los bichos, de nueche, formen galaxes, y la lluna escurez cuando’l sueñu t’algama. Un prau pue ser munches coses, d’anguaño y d’antaño, y quien lu tien cerca nun ye a imaxinar la vida ensin él.

«La cita de Virxilio al entamu del llibru —O ubi campi! (¿Ónde tán los campos?)— ye lo que nós pensamos namás que pasamos una temporadina en ciudaes o paisaxes ermos», esplica Daniel. «Tengo un primu marineru que diz que la mar, al contrario de la creyencia popular, ensiguida agobia y altera. Sin embargu, un prau apacigua y serena, faite sentite seguru y en casa. Y, al empar, llibre», añade l’autor.

Cola mesma llibertá, Granda aguapia’l so Prau a golpe pallabres, fai un montón coles rimes que sobren y échase un ratu esperando a quien llee, que pue entrar y fartucase de mores, cantar l’estribillu al altu la lleva y sacar metáfores de los garapiellos o, con procuru, de los oricios que pasen xiblando.

Un prau pue ser munches coses y munchos praos distintos caben dientro Prau. Poro, p’axuntar caún nesti llibru, como en texendo una manta recuerdos, Ester y Daniel tiraron d’esperiencies propies per valles, cuetos y brañes. «Tolos domingos, mios pas entamaben una escursión», diz Ester Sánchez, «una caminata de quince o venti quilómetros per siendes y conceyos asturianos, asina que, dende mui cría, sé lo que ye zampar un bocáu nuna braña, el vértigu d’asomase a un escobiu, siguir les foces d’un ríu, travesar una cordal, pisar antigües calzaes romanas, esclucar nes cabañes de los pastores, meter los pies nun ríu xeláu, sentir soníos ente la maleza, dormir en refuxos o pañar setes, castañes o ablanes».

«Daniel espresa mui bien el sentíu d’esti llibru», amesta Ester, «cuando diz lo qu’un prau supón pa un asturianu. Esi “llugar nel mundu” ye daqué propio, mui lligao a la nuesa esencia. Por exemplu, n’Andalucía nun conocen el sentíu de “prau” como nós lu entendemos. Pa ellos la naturaleza ye’l campu, más cercanu a la tierra y con colores diferentes a los nuesos verdes. Si lleves a un andaluz pal monte, o pa la viesca, cuasi cuasi que-y da mieu pisalos, porque nunca nun lo esperimentara. Queden ablucaos».