Selmana de les Lletres Asturianes 2023. Presentación del llibru “Cantar de mi mesmu”, por Milio Ureta

Selmana de les Lletres Asturianes 2023

MARTES, 2 DE MAYO
19:30h.

Presentación del llibru

Cantar de mi mesmu, de Walt Whitman

Por Milio Ureta (traductor)

Sala Juvenil de la Biblioteca Pública de Mieres

Inscripción previa na Biblioteca

Walt Whitman foi’l poeta de la llibertá y la inclusión: el poeta de les minoríes, y de les muyeres, y el de los desheredaos.Foi’l primer bardu modernu d’América y el cantor de la so democracia recién parida. anteísta, xabaz y pansexual, místicu y llibertín, Whitman cultivó también l’autosuficiencia del trescendentalismu emersonianu, y foi capaz de crear con too ello un canon poéticu y lliterariu optimista, vital ya inéditu, pa la so nación de munches naciones (la que, de siguío, diba ser llamada a dominar el mundo).
La lletra impreso nes páxines d’esti Cantar de mi mesmu ye la del país del gris oceánicu y los cazadores de ballenes; ye la lletra de la democracia moderna a les puertes d’una guerra, la de los llabriegos y el trigu, la de los algodonales; ye la lletra de les ciudades nacientes, y les mines, y los tramperos; la de la tierra sagráo de los indios invadíos; la lletra de los güeyos ensin fondu de los gües, la del deséu calláu de les muyeres, y las de los esclavos y lo shomes llibres; ye la lletra de los colonos y les races; la lletra de los Creos y los sentíos; la de los cuerpos y les ánimes.
La prestosísima traducción d’esti Cantar… fírmala Milio Ureta, y vien escrita n’asturianu centroriental. L’escritor ribeseyanu fainos el regalu de la más alta lliteratura americana, envuelta en papel de periódicu y papel de cera; vistida en pañu y en tela vichy. Y la llingua asturiana –con esti Whitman- ta en tiempo de festexar. Tu que yá lo ties too lleío y entendío de Walt Whitman; o que quiciabes nun yeres allugalu más allá d’El Club de los Poetes Muertos, o’l desenllaz lliterariu de la cocina de metanfetamines de Breaking Bad… atiendi si almites conseyu, y da-y oportunidá a esti Cantar de mi mesmu que ties nes manes.
Eso sí, tate al quite: vas nortiar más pelo bravo que pelo sabío, y sicasí, vas alcontrate nes fueyes… Llueu nos cuentes.

Milio Ureta (Ribeseya, Asturies, 1970). Formóse nel desapaecíu Institutu del Teatru y les Artes Escéniques de Xixón; nel 1996 múdase pa Madrid pa trabayar na compañía Réplika Teatro. Interesáu pol discursu posdramáticu del teatro, nel 2001 mancha pa Barcelona y anicia estudios de dramaturxa y dirección escénica nel Institut del Teatre, vinculándose tamién al ámbito profesional del turismo y el patrimonio. Nel 2014 gradúase n’Humanidaes pola Universitat Oberta de Catalunya. Amante de los idiomas y convencíu patrimonialista, anguaño trabaya como guía de turismo y intérprete de patrimonio en Ribeseya. Nel 2019 publico Poemes del amor simétricu, poemariu que llegó a tener una segunda edición. Más tarde editó la versión asturiana de la obra fundamental de Walt Whitman, Cantar de mi mesmu. Ta acabante ganar ún de los premios de poesía de más prestixu n’Asturies, el Teodoro López Cuesta que convoca l’Ayuntamientu de Mieres nel 2021 con Pexe les manes.