El Conceyu de Mieres, al traviés de la Conceyalía de Normalización Llingüística que dirixe Belén Alonso, informa de que’l Boletín Oficial del Principáu d’Asturies (BOPA) publicó güei l’extractu de la convocatoria 2020 del Premiu Teodoro Cuesta de Poesía en llingua asturiana na so XXIX edición. Trátase del galardón más prestixosu de la poesía n’asturianu, que tará dotáu d’un únicu premiu de 4.000 euros, demás de contemplar la posibilidá de promover la publicación del poemariu. Según consta nes bases, van poder participar toles persones que lo deseen con un poemariu inéditu, orixinal y escrito en llingua asturiana. Estos trabayos entregaránse, con orixinal y cuatro copies, na Secretaría de la Casa de Cultura de Mieres o por corréu certificáu a esta mesma dirección: cai Manuel Llaneza, 8, 33600, Mieres. El plazu de presentación tará abierto del 1 al 15 de payares. Los poemarios entregaránse ensin firma, con pseudónimu o lema y figurando el nome y señes en sobre zarráu.
Como n’ediciones anteriores, el xuráu va tar integráu por una persona representante de l’Academia de la Llingua Asturiana, una persona representante del ámbitu editorial, una persona de los medios de comunicación y una representante del Conceyu de Mieres. Autores destacaos de les lletres asturianes como Berta Piñán, Xuan Bello, Esther Prieto, Pablo Antón Marín Estrada o Vanesa Gutiérrez formen parte del palmarés d’esti importante premiu.
