Alfredo Garay Menéndez resultó ganador del Premiu Teodoro Cuesta de Poesía na so XXXIII edición. El xuráu, reuníu ayer miércoles, escoyó esti poemariu ente los 14 presentaos, destacando la voz poética dende la que ta construyíu, asina como’l so tonu llíricu que recalca’l simbolismu, nun trabayu que tenga rendir homenaxe a la vida de la marina y de la xente marinero, amás de pintar lo duro de les sos relaciones, la probitú de la vida familiar, del pueblu…
El xuráu tuvo formáu por Mª Jesús Rodríguez Guillón, Milio Ureta Soto, Pablo Rodríguez Medina, Esther Prieto Alonso y Laura Marcos Domínguez, actuando como presidenta del mismu Belén Alonso Losa, conceyala d’Educación y Normalización Llingüística de Mieres y como secretaria Luisa Suárez Sáez, técnica de Normalización del Ayuntamientu.
El Premiu Teodoro Cuesta, dotáu con 4.000 euros, creóse nel añu 1991 y considérase’l más prestixosu de los que se convoquen n’Asturies nel ámbito la poesía, contando nel so palmarés con autores de prestixu de les lletres asturianes como Berta Piñán, Xuan Bello, Lourdes Álvarez o Vanessa Gutiérrez. Nomes a los qu’agora s’amiesta Alfredo Garay Menéndez, quien cuenta con tres llibros de poemes publicaos y tiene participao en distintes antoloxíes, amás d’haber recibío distintos premios y accésits en dellos certámenes lliterarios.
